គ្មានអ្វីអាចបញ្ឈប់ទឹកចិត្តមនុស្សម្នាក់ដែលមានបេសកកម្មច្បាស់លាស់បានឡើយ ជាពិសេសនៅពេលដែលបេសកកម្មនោះគឺដើម្បីប្រយោជន៍កុមារ។ លោក ទីវ តារារិទ្ធ ជានិមិត្តរូបនៃស្មារតីពលរដ្ឋកម្ពុជាដ៏អស្ចារ្យ កំពុងតែបំពេញបេសកកម្មជិះកង់ឆ្លងទ្វីបពីអាស៊ីទៅអឺរ៉ុប ដើម្បីរៃអង្គាសថវិកាជួយមន្ទីរពេទ្យកុមារនៅកម្ពុជា។

អ្នកជិះកង់ដែលមានជំនាញថតរូប និងវីដេអូរូបនេះ បានចាប់ផ្តើមដំណើរដ៏វែងឆ្ងាយរបស់លោកកាលពីថ្ងៃទី ៦ ខែ មិថុនា ឆ្នាំ ២០២៤ ចេញពីទឹកដីអង្គរ ខេត្តសៀមរាប។ ជាមួយនឹងគោលដៅជិះកង់ចម្ងាយប្រមាណ ២០,០០០ ទៅ ៤០,០០០ គីឡូម៉ែត្រ លោកមានបំណងរៃអង្គាសថវិកាចំនួន ២៥០,០០០ ដុល្លារអាមេរិក ដើម្បីឧបត្ថម្ភមន្ទីរពេទ្យកុមារអង្គរ (AHC) នៅសៀមរាប និងមន្ទីរពេទ្យគន្ធបុប្ផា។ គិតត្រឹមចុងឆ្នាំ ២០២៥ នេះ លោកជិះកង់បានចម្ងាយផ្លូវជាង ៣មុឺន គីឡូម៉ែត្ររួចទៅហើយ ដោយឆ្លងកាត់ប្រទេសនានានៅអាស៊ីអាគ្នេយ៍ អាស៊ីកណ្តាល ទ្វីបអឺរ៉ុប និងបច្ចុប្បន្នកំពុងស្ថិតនៅប្រទេសម៉ារ៉ុក ក្នុងទ្វីបអាហ្វ្រិក។

មុននឹងឈានដល់បេសកកម្មដ៏ធំនេះ លោក ទីវ តារារិទ្ធ ក៏ធ្លាប់បានបញ្ចប់បេសកកម្ម “ជិះកង់សប្បុរសធម៌អាស៊ីអាគ្នេយ៍” កាលពីឆ្នាំ ២០២៣ ផងដែរ។ ក្នុងដំណើរនោះ លោកបានជិះកង់ឆ្លងកាត់ប្រទេសកម្ពុជា វៀតណាម ឡាវ ថៃ ម៉ាឡេស៊ី និងសិង្ហបុរី ដែលបានរៃអង្គាសថវិកាបានជាង ៥០,០០០ ដុល្លារអាមេរិក សម្រាប់មន្ទីរពេទ្យកុមារអង្គរ។

ការតស៊ូព្យាយាមរបស់លោក ទីវ តារារិទ្ធ មិនមែនត្រឹមតែជាការបង្ហាញពីកម្លាំងកាយចិត្តប៉ុណ្ណោះទេ ប៉ុន្តែវាក៏ជាសារមួយបង្ហាញអំពីក្តីមេត្តាធម៌ចំពោះក្មេងៗជំនាន់ក្រោយ។ រាល់គីឡូម៉ែត្រដែលលោកជិះកង់ គឺជាក្តីសង្ឃឹមមួយសម្រាប់កុមារកម្ពុជារាប់ពាន់នាក់ដែលត្រូវការជំនួយផ្នែកសុខាភិបាល។